ଭୁବନେଶ୍ୱର ଇଡ୍କୋ ପ୍ରଦର୍ଶନୀ ପଡ଼ିଆରେ ପାଳିତ ହେଲା ଦ୍ୱାଦଶ ରାଜ୍ୟସ୍ତରୀୟ ଜାତୀୟ ହସ୍ତତନ୍ତ ଦିବସ । ଏହି ସମାରୋହରେ ହସ୍ତତନ୍ତ, ବୟନ ଓ ହସ୍ତଶିଳ୍ପ ବିଭାଗ ପକ୍ଷରୁ ଆକର୍ଷଣୀୟ ଫ୍ୟାଶନ୍ ଶୋ’ ଆୟୋଜିତ ହୋଇଥିଲା । ଯେଉଁଥିରେ ଝଲସିଥିଲା ଓଡ଼ିଶାର ହସ୍ତତନ୍ତ । ଏହି ର୍ୟାମ୍ପ୍ ଶୋ’ରେ ନ୍ୟାସନାଲ୍ ଇନ୍ଷ୍ଟିଚ୍ୟୁଟ୍ ଅଫ୍ ଫ୍ୟାଶନ୍ ଟେକ୍ନୋଲୋଜି’ (ନିଫ୍ଟ), ଭୁବନେଶ୍ୱର ଏବଂ ଆଦିତ୍ୟ ବିର୍ଲା ଗ୍ରୁପ୍ ଲିଭା ଦ୍ୱାରା ମୋଟ ୪ଟି ପର୍ଯ୍ୟାୟ ପ୍ରଦର୍ଶିତ ହୋଇଥିଲା । ନିଫ୍ଟ ଦ୍ୱାରା ପ୍ରଥମ ୨ଟି ପର୍ଯ୍ୟାୟରେ ଜିଆଇ ଟ୍ୟାଗ୍ ପ୍ରାପ୍ତ ହସ୍ତତନ୍ତ ବସ୍ତ୍ରକୁ ନେଇ ପ୍ରସ୍ତୁତ ପୋଷାକ ପ୍ରଦର୍ଶିତ ହୋଇଥିଲା । ଏଥିସହିତ ଐତିହାସିକ ଧଳାପଥର ପରଦା ଓ ଫ୍ୟାବ୍ରିକ୍ରୁ ପ୍ରସ୍ତୁତ ୧୦ଟି ଆଧୁନିକ ପୋଷାକ ଏବଂ ଟସର ଫ୍ୟାବ୍ରିକ୍ରୁ ୧୦ଟି ଆକର୍ଷଣୀୟ ପୋଷାକ ସ୍ଥାନ ପାଇଥିଲା ।
ଆଦିତ୍ୟ ବିର୍ଲା ଗ୍ରୁପ୍ ଲିଭା ଦ୍ୱାରା ଦୁଇଟି ପର୍ଯ୍ୟାୟରେ ପାରମ୍ପରିକ ଶିଳ୍ପକଳା ଓ ସମସାମୟିକ ଫ୍ୟାଶନ୍ର ଅପୂର୍ବ ମିଶ୍ରଣ ଦେଖିବାକୁ ମିଳିଥିଲା ।ତୃତୀୟ ପର୍ଯ୍ୟାୟରେ ପ୍ରସିଦ୍ଧ ନୂଆପାଟଣା ହସ୍ତତନ୍ତ କ୍ଲଷ୍ଟରର ୧୨ଟି ସୁନ୍ଦର ଶାଢ଼ି ଏବଂ ଚତୁର୍ଥ ପର୍ଯ୍ୟାୟରେ ବରଗଡ଼ ଡବଲ୍ ଇକତ୍ର କଳାତ୍ମକତାକୁ ନେଇ ୧୨ଟି ଆଧୁନିକ ପୋଷାକ (୬ଟି ପୁରୁଷ ଓ ୬ଟି ମହିଳା ପୋଷାକ) ପ୍ରଦର୍ଶିତ ହୋଇଥିଲା । କାର୍ଯ୍ୟକ୍ରମରେ ବିଭାଗୀୟ ଅଧିକାରୀ ଓ ଅଂଶଗ୍ରହଣକାରୀ ସଂସ୍ଥାର ଅଧିକାରୀ ଯୋଗ ଦେଇଥିଲେ ।
10 Total Count