ଇସ୍ରାଏଲରେ ନିର୍ବାଚନ ପରଠାରୁ ଲାଗି ରହିଥିବା ରାଜନୈତିକ ଅଚଳାବସ୍ଥା ଏକ ନିର୍ଣ୍ଣାୟକ ମୋଡ଼ରେ ପହଞ୍ଚିଛି। ଇସ୍ରାଏଲର ରାଷ୍ଟ୍ରପତି ଆଇଜାକ୍ ହର୍ଜୋଗ୍ ୟାଶାର ପାର୍ଟି ମୁଖ୍ୟ ଏବଂ ପୂର୍ବତନ ସେନା ମୁଖ୍ୟ ଗାଦି ଆଇଜେନକୋଟଙ୍କୁ ପରବର୍ତ୍ତୀ ସରକାର ଗଠନ ପାଇଁ ସୁଯୋଗ ଦେଇଛନ୍ତି ।
ହର୍ଜୋଗ୍ ଘୋଷଣା କରିଛନ୍ତି ଯେ, ସେ ଗାଦି ଆଇଜେନକୋଟଙ୍କୁ ପରବର୍ତ୍ତୀ ସରକାର ଗଠନର ଦାୟିତ୍ୱ ଦେବେ । ଏହା ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁଙ୍କ କ୍ଷମତାରେ ରହିବାର ପ୍ରୟାସକୁ ଏକ ବଡ଼ ଧକ୍କା ଦେଇଛି । ରବିବାର ସନ୍ଧ୍ୟା ୫ଟାରେ ରାଷ୍ଟ୍ରପତି ବାସଭବନରେ ଏକ ସମାରୋହରେ ରାଷ୍ଟ୍ରପତି ହର୍ଜୋଗ ଆନୁଷ୍ଠାନିକ ଭାବରେ ଆଇଜେନକୋଟଙ୍କୁ ସରକାର ଗଠନ ପାଇଁ ଜନାଦେଶ ହସ୍ତାନ୍ତର କରିବେ ।
ରାଷ୍ଟ୍ରପତିଙ୍କ ଠାରୁ ଜନାଦେଶ ପାଇବା ପରେ, ଆଇଜେନକୋଟଙ୍କୁ ସରକାର ଗଠନ କରିବା ପାଇଁ ୨୮ ଦିନ ସମୟ ମିଳିବ । ଆବଶ୍ୟକ ହେଲେ ରାଷ୍ଟ୍ରପତି ତାଙ୍କୁ ୧୪ ଦିନର ଅତିରିକ୍ତ ସମୟ ମଧ୍ୟ ଦେଇପାରିବେ। ଯଦି ସେ ସରକାର ଗଠନ କରିବାରେ ବିଫଳ ହୁଅନ୍ତି, ତେବେ ନେତାନ୍ୟାହୁଙ୍କୁ ସୁଯୋଗ ଦିଆଯାଇପାରେ ।
ରାଷ୍ଟ୍ରପତି ହର୍ଜୋଗ ବୁଧବାର ଏବଂ ଗୁରୁବାର ଦିନ ନେସେଟ୍ର ସମସ୍ତ ବିଜୟୀ ଦଳମାନଙ୍କ ସହିତ ଆଲୋଚନା କରିଥିଲେ। ତା’ପରେ ସେ ନେତାନ୍ୟାହୁ ଏବଂ ଆଇଜେନକୋଟଙ୍କ ଗୋଷ୍ଠୀ ସମେତ ବିଭିନ୍ନ ରାଜନୈତିକ ବର୍ଗର ନେତାମାନଙ୍କ ସହିତ ପୁଣି ଥରେ କଥା ହୋଇଥିଲେ। ସେ ଶନିବାର ସନ୍ଧ୍ୟାରେ ଆଇଜେନକୋଟ ଏବଂ ନେତାନ୍ୟାହୁଙ୍କୁ ତାଙ୍କର ନିଷ୍ପତ୍ତି ବିଷୟରେ ଜଣାଇଥିଲେ।
9 Total Count