ଭୋଟର ତାଲିକାର ସ୍ୱତନ୍ତ୍ର ସଘନ ସଂଶୋଧନ (ଏସ୍ଆଇଆର) ରଦ୍ଦ ସହ ମୁଖ୍ୟ ନିର୍ବାଚନ କମିଶନର (ସିଇସି) ଜ୍ଞାନେଶ କୁମାରଙ୍କ ଇସ୍ତଫା ଦାବିରେ ଆସନ୍ତାକାଲି (ଶନିବାର) ନୂଆଦିଲ୍ଲୀରେ କକ୍ରୋଚ ଜନତା ପାଟି ର୍ (ସିଜେପି) ଆନ୍ଦୋଳନ କରିବାକୁ ପ୍ରସ୍ତୁତି କରଛି । ଏହା ପୂର୍ବରୁ ଆକ୍ସନ ମୋଡରେ ଆସିଛି ଦିଲ୍ଲୀ ପୁଲିସ୍ । ଟ୍ୟୁବର ଧ୍ରୁବ ରାଠିଙ୍କୁ ତାଙ୍କ ଗୁରୁଗ୍ରାମ ସ୍ଥିତ ବାସଭବନରେ ଅଟକ ରଖିବା ଖବର ଆସିଛି । ସେହିପରି ସିଜେପି ଫାଉଣ୍ଡର ଅଭିଜିତ୍ ଦୀପକେଙ୍କୁ ଦିଲ୍ଲୀ ଏୟାରପୋର୍ଟ ପୁଲିସ୍ ଅଟକ ରଖିଛି । ସିଜେପି ଆନ୍ଦୋଳନ ପୂର୍ବରୁ ଦିଲ୍ଲୀ ପୁଲିସ୍ ଆକ୍ସନରେ ରହିଛି । ମୁମ୍ୱାଇରୁ ଆସି ଦିଲ୍ଲୀ ବିମାନବନ୍ଦରରେ ଅଭିଜିତ ଦୀପକେ ପହଞ୍ଚିବା ପରେ ତାଙ୍କୁ ଅଟକ ରଖାଯାଇଛି । ଏହା ସହିତ ଯାହା ସୂଚନା ହସ୍ତଗତ ହୋଇଛି ସକାଳୁ ଜନ୍ତରମନ୍ତରରେ ସୁରକ୍ଷା ବ୍ୟବସ୍ଥା କଡ଼ାକଡ଼ା ହୋଇଛି । ଧିରେ ଧିରେ ଆନ୍ଦୋଳନକାରୀଙ୍କ ଭିଡ ଜମୁଥିଲା । ଏହାରି ଭିତରେ ଦିଲ୍ଲୀ ପୁଲିସ୍ ୬୦୦ରୁ ଅଧିକ ଆନ୍ଦୋଳନକାରୀଙ୍କୁ ଅଟକ ରଖିଥିବା ରିପୋର୍ଟ ଆସୁଛି ।
ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କ ଇସ୍ତଫା ଦାବିରେ ହେବାକୁ ଥିବା ଆନ୍ଦୋଳନ ପୂର୍ବରୁ ଦିଲ୍ଲୀରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି । ଆନ୍ଦୋଳନକୁ ଦୃଷ୍ଟିରେ ରଖି ରାଜଧାନୀରେ ଶୁକ୍ରବାର ରାତିସାରା କଡ଼ା ପ୍ରହରା ଦେଇଛି । ୟୁଟ୍ୟୁବର ଧ୍ରୁବ ରାଠିଙ୍କୁ ଦିଲ୍ଲୀ ପୁଲିସ ଗୁରୁଗ୍ରାମର ସେକ୍ଟର ୫୬ ସ୍ଥିତ ତାଙ୍କ ବାସଭବନରୁ ଅଟକ ରଖିଛି । ମୁମ୍ବାଇରୁ ଦିଲ୍ଲୀରେ ପହଞ୍ଚିବା ପରେ ସୌରଭ ଦାସ ଏବଂ ଆଶୁତୋଷ ରାଙ୍କାଙ୍କୁ ମଧ୍ୟ ଅଟକ ରଖାଯାଇଛି । ଦିଲ୍ଲୀର ବିଭିନ୍ନ ଅଞ୍ଚଳରେ ପୁଲିସ ମୁତୟନ ବଢ଼ାଯିବା ସହ ସହରର ପ୍ରବେଶ ପଥ ଓ ସୀମାନ୍ତ ଅଞ୍ଚଳରେ ଯାଞ୍ଚ କଡ଼ାକଡ଼ି କରାଯାଇଛି ।
ସିଜେପି ଫାଉଣ୍ଡର ଅଭିଜିତ୍ ଦୀପକେ ଦିଲ୍ଲୀ ବିମାନବନ୍ଦରରେ ଲ୍ୟାଣ୍ଡ କରିବା ପରେ ବିମାନ ଭିତରୁ ଏୟାରପୋର୍ଟ ପୁଲିସ୍ ତାଙ୍କୁ ଅଟକ ରଖିଥିବା ଚିତ୍ର ସାମ୍ନାକୁ ଆସିଛି । ପୁଲିସ୍ ସହ ଅଭିଜିତଙ୍କ ଯୁକ୍ତିତର୍କ ହେଉଥିବା ଦେଖିବାକୁ ମିଳିଛି । ସେ କହିଛନ୍ତି ମୁଁ ଏଠାକୁ ଆରେଷ୍ଟ ହେବାକୁ ଆସିଛି । ମୋତେ ଅରେଷ୍ଟ କର । ଏହାର ଜବାବରେ ଦିଲ୍ଲୀ ପୁଲିସ୍ ଅଭିଜତଙ୍କୁ କହିଛନ୍ତି ନା ଏହା ଗିରଫ ନୁହେଁ । ଦୟାକରି ସହଯୋଗ କରନ୍ତୁ ।
ଆନ୍ଦୋଳନରେ କିଛି ରାଜନୈତିକ ଦଳ, ଛାତ୍ର ସଙ୍ଗଠନ ଓ ନାଗରିକ ସମାଜ ସାମିଲ ହେବାର ସମ୍ଭାବନା ରହିଛି । କିନ୍ତୁ ଆନ୍ଦୋଳନ ପାଇଁ ପୁଲିସ ଅନୁମତି ଦେଇନାହିଁ । ଏଥିସହ ଜନ୍ତରମନ୍ତର ଓ ଆଖପାଖ ଅଞ୍ଚଳରେ କଟକଣା ଲଗାଯାଇଛି । ହେଲେ ସିଜେପି ଏହି ଆନ୍ଦୋଳନ ନିଶ୍ଚିତ ହେବ ବୋଲି କହିବା ସହ ଏଥିରେ ବହୁସଂଖ୍ୟାରେ ସାମିଲ ହେବାକୁ ଅନୁରୋଧ କରିଛି । ସିଜେପିର ଆନ୍ଦୋଳନକୁ ଦୃଷ୍ଟିରେ ରଖି କେନ୍ଦ୍ର ସରକାର ସମଗ୍ର ଦିଲ୍ଲୀକୁ ସୁରକ୍ଷାର ଅଭେଦ୍ୟ ଦୁର୍ଗରେ ପରିଣତ କରିଛନ୍ତି । ଜନ୍ତରମନ୍ତର ଓ ତାର ଆଖପାଖ ଅଞ୍ଚଳରେ ବିଏନ୍ଏସ୍ ଧାରା ୧୬୩ ଲାଗୁ କରାଯାଇଛି । ସୁରକ୍ଷା ଲାଗି ପ୍ରାୟ ୩୮ ହଜାର ଯବାନଙ୍କୁ ନିୟୋଜିତ କରାଯାଇଛି । ସେଥିରେ ୨୩ ହଜାର କେନ୍ଦ୍ରୀୟ ଅର୍ଦ୍ଧସାମରିକ ବାହିନୀର ଯବାନ ଏବଂ ଦିଲ୍ଲୀ ପୁଲିସର ୧୫ ହଜାର ଯବାନ ସାମିଲ ଅଛନ୍ତି । ଫ୍ରଣ୍ଟଲାଇନରେ ଥିବା ୧୫୦ ଯବାନଙ୍କ ଦେହରେ ଲାଗିଛି ବଡି କ୍ୟାମେରା । ଯାହାଫଳରେ ପ୍ରଦର୍ଶନ ବେଳେ କୌଣସି ପ୍ରକାର ଅପ୍ରୀତିକର ଘଟଣାର ରେକର୍ଡିଂ କରାଯାଇପାରିବ । ଏଥିସହ ବିଭିନ୍ନ ସ୍ଥାନରେ ୩୦୦ ସିସିଟିଭି କ୍ୟାମେରା ମଧ୍ୟ ଲଗାଯାଇଛି । ନୂଆଦିଲ୍ଲୀ ଓ ହଜରତ ନିଜାମୁଦ୍ଦିନ ଷ୍ଟେସନକୁ ଆସିବାକୁ ଥିବା ୩୮ଟି ଟ୍ରେନ ବାତିଲ କରିଦିଆଯାଇଛି । ୫୭ଟି ମେଟ୍ରୋ ଷ୍ଟେସନ ବନ୍ଦ କରିଦିଆଯାଇଛି ।
48 Total Count