ଦଳ ବିରୋଧୀ ମନ୍ତବ୍ୟ ଦେବା ପଡ଼ିଲା ମହଙ୍ଗା। ବିଜୁ ଜନତା ଦଳରୁ ପୂର୍ବତନ ମନ୍ତ୍ରୀ ତଥା ବରିଷ୍ଠ ନେତା ପ୍ରଫୁଲ ମଲ୍ଲିକ ନିଲମ୍ବିତ। ଏନେଇ ବିଜେଡ଼ି ପକ୍ଷରୁ ପ୍ରେସ୍ ରିଲିଜ୍ ଜାରି କରାଯାଇଛି। ଗତକାଲି ଦଳର ପରିଚାଳନା ଓ କାର୍ଯ୍ୟ ଧାରା ନେଇ ଅସନ୍ତୋଷ ଝାଡ଼ି ଥିଲେ ପ୍ରଫୁଲ୍ଲ ମଲ୍ଲିକ।
ବିଜେଡି କନ୍ଦଳ ଥମିବାର ନାଁ ଧରୁନି । ଅସନ୍ତୁଷ୍ଟ ନେତା ନିତିଦିନ ନିଆଁ ଉଗାଳୁଛନ୍ତି । ଦଳୀୟ ପରିଚାଳନା ନେଇ ବର୍ଷୁଛନ୍ତି । ଏମିତିକି ଦଳ ଛାଡ଼ିବା ଅଭିଯାନ ବି ଆରମ୍ଭ ହୋଇଗଲାଣି । ଗୁରୁବାର କଟକର ଜଣାଶୁଣା ଛାତ୍ର ନେତା ହରିଶଙ୍କର ରାଉତ ବିଜେଡିରୁ ଇସ୍ତଫା ଦେବା ସହ ନେତାଙ୍କ ନାଁ ନେଇ ବର୍ଷିଛନ୍ତି । ଏପଟେ ଭେଟେରାନ ପ୍ରଫୁଲ୍ଲ ମଲ୍ଲିକ ଦଳର ପରିଚାଳନା ଓ କାର୍ଯ୍ୟ ଧାରା ନେଇ ଅସନ୍ତୋଷ ଝାଡ଼ିଥିଲେ । ଦରକାର ପଡ଼ିଲେ ଦଳ ଛାଡ଼ିବେ ବୋଲି କହିଥିଲେ। ଏହା ପୂର୍ବ ଏନ୍ ଭାସ୍କର ରାଓ, ଲାଲବିହାରି ହମିରିକା ବିଜେଡ଼ିରୁ ଇସ୍ତଫା ଦେଇଥିଲେ।
ସେପଟେ ଗତକାଲି ଅସନ୍ତୋଷ ଝାଡ଼ି ପ୍ରଫୁଲ୍ଲ କହିଥିଲେ, ମୁଁ ଦଳରେ ଅଛି । କିନ୍ତୁ କୌଣସି ସାଂଗଠନିକ କାର୍ଯ୍ୟକ୍ରମରେ ଯୋଗ ଦେଉନି । ଆଗକୁ ଯଦି ଦଳ ଠିକ୍ ଭାବେ ନ ଚାଲେ, ତେବେ ଦଳଠାରୁ ଦୂରେଇ ଯିବି । ସେ ଆହୁରି କହିଥି, ବିଜେଡି ଠିକଣା ଭାବେ ବିରୋଧୀ ଦଳର ଭୂମିକା ନିର୍ବାହ କରୁନି । ପୂର୍ବ ବିଚାରଧାରାରେ ଦଳ ନାହିଁ । ଦଳକୁ ସଂଗଠିତ କରିବାକୁ କିଛି ପରାମର୍ଶ ଦେଇଥିଲୁ । ପିଏସି ଓ ଶୃଙ୍ଖଳା କମିଟି ଭଳି ଦୁଇଟି ନିଷ୍ପତ୍ତି ଗ୍ରହଣ କରାଯାଇଛି । ଅନ୍ୟ ପ୍ରସ୍ତାବଗୁଡ଼ିକୁ ଏଯାଏ ଗ୍ରହଣ କରାଯାଇନି । ବର୍ତ୍ତମାନ ନୂଆ ବିଜେଡି ଗଠନର ସମୟ ନୁହେଁ । ତେବେ ଗତକାଲିର ଏହି ମନ୍ତବ୍ୟ ପରେ ପ୍ରଫୁଲ୍ଲ ମଲ୍ଳିକଙ୍କୁ ଆଜି ବିଜେଡ଼ି ସସ୍ପେଣ୍ଡ କରିଛି।
5 Total Count