ଭୁବନେଶ୍ୱର: ଓଡ଼ିଶା ନଲେଜ୍ କର୍ପୋରେସନ୍ ଲିମିଟେଡ୍ (ଓକେସିଏଲ) ପକ୍ଷରୁ ଆଜି ଏକ ଦିନିକିଆ ‘ଇନଫ୍ଲୁଏନ୍ସର କନେକ୍ଟ’ କାର୍ଯ୍ୟକ୍ରମ ଏହାର ମୁଖ୍ୟ କାର୍ଯ୍ୟାଳୟ ପରିସରରେ ଅନୁଷ୍ଠିତ ହୋଇଯାଇଛି । ଏହାକୁ ଉଦ୍ଘାଟନ କରି ଓକେସିଏଲର ପରିଚାଳନା ନିର୍ଦ୍ଦେଶକ ଡକ୍ଟର ମନୋରଞ୍ଜନ ପୁଥଲ ସଂସ୍ଥାର ବ୍ୟାପକ ଲକ୍ଷ୍ୟ ଏବଂ ଦକ୍ଷତା ବିକାଶ ପାଇଁ ପ୍ରଯୁକ୍ତିବିଦ୍ୟା ଓ ଡିଜିଟାଲ୍ ପ୍ଲାଟଫର୍ମର ଉପଯୋଗ ଉପରେ ଗୁରୁତ୍ୱାରୋପ କରିଥିଲେ।
ଓଡ଼ିଶା ଲୋକଙ୍କ ନିକଟରେ ପ୍ରଯୁକ୍ତିବିଦ୍ୟା, ଜ୍ଞାନ ଓ ସୁଯୋଗ ପହଞ୍ଚାଇବା ଏବଂ ସହରାଞ୍ଚଳର ସୀମା ପାର ହୋଇ ଡିଜିଟାଲ୍ ସଶକ୍ତୀକରଣକୁ ବାସ୍ତବତାର ରୂପ ଦେବା ପାଇଁ ଓକେସିଏଲ ନିରନ୍ତର ପ୍ରୟାସ ଜାରି ରଖିଛି। କୃତ୍ରିମ ବୁଦ୍ଧିମତ୍ତା (ଏଆଇ) ଏବେ ଏକ ନୂତନ ସମ୍ଭାବନା କ୍ଷେତ୍ର ଭାବରେ ବର୍ତ୍ତମାନ ଉଭା ହୋଇଛି। ଏହାକୁ ଭାରତୀୟ ଅର୍ଥନୀତିରେ ଯୋଡି଼ବା ସହ ସାମାଜିକ ବିକାଶର ଏକ ମୁଖ୍ୟ ଚାଳକ ଭାବେ ବ୍ୟବହାର କରିବାକୁ ସେ ଆହ୍ୱାନ ଦେଇଥିଲେ।
ଅଂଶଗ୍ରହଣକାରୀଙ୍କ ମଧ୍ୟରେ ଏଆଇ ର ବ୍ୟାବହାରିକ ଦକ୍ଷତା ବିକାଶ କରିବା ଏବଂ ଇନଫ୍ଲୁଏନ୍ସରମାନଙ୍କ ମଧ୍ୟରେ ଏକ ସହଯୋଗୀ ନେଟୱାର୍କ ଗଠନ କରିବା ଏହି କାର୍ଯ୍ୟକ୍ରମର ମୁଖ୍ୟ ଲକ୍ଷ୍ୟ। ଏଥିରେ ୫୦ ଜଣ ଇନଫ୍ଲୁଏନ୍ସର ତଥା କଣ୍ଟେଣ୍ଟ କ୍ରିଏଟର ଯୋଗଦେଇଥିଲେ। ଅଂଶଗ୍ରହଣକାରୀଙ୍କୁ ଅତ୍ୟାଧୁନିକ ଏଆଇ ଟୁଲ୍ଗୁଡ଼ିକ ସହ ବ୍ୟାବହାରିକ ପରିଚୟ କରାଇବା ଏବଂ ବିଷୟବସ୍ତୁ ନିର୍ମାଣ, ଯୋଗାଯୋଗ ଓ ଡିଜିଟାଲ୍ ଉଦ୍ଭାବନ କ୍ଷେତ୍ରରେ ଏହାର ପ୍ରୟୋଗକୁ ଅନୁସନ୍ଧାନ କରିବା ପାଇଁ ଉତ୍ସାହିତ କରିବା ଉଦ୍ଦେଶ୍ୟରେ ଏହି କାର୍ଯ୍ୟକ୍ରମର ରୂପରେଖ ପ୍ରସ୍ତୁତ କରାଯାଇଥିଲା।
ଏହି ଅବସରରେ ଓକେସିଏଲ ଏକ ୧୫-ଦିନିଆ କ୍ରିଏଟର୍ ଚ୍ୟାଲେଞ୍ଜ ଘୋଷଣା ହୋଇଥିଲା। ଯାହା ଅଂଶଗ୍ରହଣକାରୀମାନଙ୍କୁ ସେମାନଙ୍କର ସୃଜନଶୀଳତା ଏବଂ ଡିଜିଟାଲ୍ ଦକ୍ଷତାକୁ ଅଭ୍ୟାସରେ ପରିଣତ କରିବାର ସୁଯୋଗ ପ୍ରଦାନ କରିବା ସହ ଏହାର ମୂଳ ଲକ୍ଷ୍ୟକୁ ପ୍ରଚାର ପ୍ରାସର କରିବ। “ଓକେସିଏଲ ଇନଫ୍ଲୁଏନ୍ସର କନେକ୍ଟ କାର୍ଯ୍ୟକ୍ରମରେ କୃତ୍ରିମ ବୁଦ୍ଧିମତ୍ତା ଏବଂ ଏଆଇ ଟୁଲ୍ଗୁଡ଼ିକ ଉପରେ ଅଧିବେଶନଗୁଡ଼ିକ ଆମକୁ ବ୍ୟବହାରିକ ଅନ୍ତର୍ଦୃଷ୍ଟି ପ୍ରଦାନ କରିଥିଲା ଯାହାକୁ ଆମେ ଆମର ବିଷୟବସ୍ତୁ ସୃଷ୍ଟି ଏବଂ ଦୈନନ୍ଦିନ ଡିଜିଟାଲ୍ କାର୍ଯ୍ୟରେ ପ୍ରୟୋଗ କରିପାରିବୁ। ଏହି କାର୍ଯ୍ୟକ୍ରମ ସହ-ନିର୍ମାତାଙ୍କ ସହିତ ସଂଯୋଗ ସ୍ଥାପନ କରିବା, ଚିନ୍ତାଧାରା ଆଦାନପ୍ରଦାନ କରିବା ଏବଂ ଏହାକୁ ସୃଜନଶୀଳ ଭାବରେ କିପରି ବ୍ୟବହାର କରାଯାଇପାରିବ ତାହା ବୁଝିବାର ସୁଯୋଗ ମଧ୍ୟ ପ୍ରଦାନ କରିଥିଲା ବୋଲି ବିଷୟବସ୍ତୁ ସୃଷ୍ଟିକାରୀ ଅନୁରାଗ ମହାନ୍ତି କହିଛନ୍ତି।
13 Total Count