ମଥୁରା: ଧର୍ମ ଏବଂ ଆଧ୍ୟାତ୍ମିକତାର ମୁଖା ପିନ୍ଧି ଶିକ୍ଷିତ ମହିଳା ଓ ଯୁବତୀମାନଙ୍କୁ ଶୋଷଣ କରୁଥିବା ଜଣେ ହାଇଟେକ୍ ଢୋଙ୍ଗୀ ବାବାଙ୍କୁ ଉତ୍ତର ପ୍ରଦେଶର ମଥୁରା ପୋଲିସ ଗିରଫ କରିଛି। ଗିରଫ ଅଭିଯୁକ୍ତଙ୍କ ନାମ ଅଭିଷେକ ମିଶ୍ର (୨୯), ଯିଏ କି ନିଜକୁ ‘ଆଦିକର୍ତ୍ତା ନାରାୟଣ ଦାସ’ ଭାବେ ପରିଚୟ ଦେଇ ଆଶ୍ରମ ଚଳାଉଥିଲେ। ଆଶ୍ଚର୍ଯ୍ୟର କଥା ହେଉଛି, ଅଭିଯୁକ୍ତ ଜଣକ ଦେଶର ପ୍ରତିଷ୍ଠିତ ଶିକ୍ଷାନୁଷ୍ଠାନ IIT ରୁର୍କୀରୁ ମେକାନିକାଲ୍ ଇଞ୍ଜିନିୟରିଂ ପାସ୍ କରିବା ସହ ବାର୍ଷିକ ୨୦ ଲକ୍ଷ ଟଙ୍କାର ଚାକିରି ଛାଡ଼ି ଏହି ପ୍ରତାରଣାର ଜାଲ ବିଛାଇଥିଲେ। ସୂଚନା ଅନୁଯାୟୀ, ଅଭିଯୁକ୍ତଙ୍କ ମୂଳ ଘର ଭୁବନେଶ୍ୱର ଅଞ୍ଚଳରେ ବୋଲି ଜଣାପଡ଼ିଛି।
ୟୁଟ୍ୟୁବ୍ ମାଧ୍ୟମରେ ବିଛାଉଥିଲେ ଜାଲ
ପୋଲିସ ସୂଚନା ଅନୁଯାୟୀ, ଅଭିଯୁକ୍ତ ଅଭିଷେକ ମିଶ୍ର ୟୁଟ୍ୟୁବ୍ରେ ‘ରାଧା କୃପା ଅମୃତ’ ନାମକ ଚାନେଲ୍ ଜରିଆରେ ହିନ୍ଦୀ ଏବଂ ଇଂରାଜୀ ଭାଷାରେ ଆଧ୍ୟାତ୍ମିକ ପ୍ରବଚନ ଦେଉଥିଲେ। ତାଙ୍କର ଏହି ହାଇଫାଇ ଶୈଳୀ ପ୍ରତି ବିଶେଷ କରି ଚାକିରିଆ ଓ ଉଚ୍ଚଶିକ୍ଷିତ ମହିଳାମାନେ ଆକର୍ଷିତ ହେଉଥିଲେ। ଏହାର ସୁଯୋଗ ନେଇ ସେ ମହିଳାମାନଙ୍କୁ ନିଜ ସଂଗଠନକୁ ଆଣୁଥିଲେ ଏବଂ ‘ଗାନ୍ଧର୍ବ ବିବାହ’ ନାମରେ ସେମାନଙ୍କ ସହ ଶାରୀରିକ ସମ୍ପର୍କ ରଖୁଥିଲେ।
କ୍ଷୀରରେ ନିଶାଦ୍ରବ୍ୟ ମିଶାଇ ଦୁଷ୍କର୍ମ ଓ ବ୍ଲାକମେଲ୍
ଛତିଶଗଡ଼ର ଜଣେ ୨୨ ବର୍ଷୀୟା ବିଏସସି ନର୍ସିଂ ଛାତ୍ରୀଙ୍କ ଅଭିଯୋଗ ପରେ ଏହି ବଡ଼ ଘଟଣାର ପର୍ଦ୍ଦାଫାଶ ହୋଇଛି। ପୀଡ଼ିତାଙ୍କ କହିବା ଅନୁଯାୟୀ, ସେ ମଥୁରାର ରାଧାକୁଣ୍ଡ ସ୍ଥିତ ବାବାଙ୍କ ଆଶ୍ରମକୁ ଯାଇଥିବା ସମୟରେ ବାବା ତାଙ୍କୁ ପ୍ରସାଦ କହି ନିଶାଦ୍ରବ୍ୟ ମିଶା କ୍ଷୀର ପିଇବାକୁ ଦେଇଥିଲେ। ଛାତ୍ରୀ ଜଣକ ଅଚେତ ହୋଇଯିବା ପରେ ଅଭିଷେକ ତାଙ୍କ ସହ ଦୁଷ୍କର୍ମ କରିବା ସହ ତାଙ୍କର କିଛି ଆପତ୍ତିଜନକ ଫଟୋ ଓ ଭିଡିଓ ରେକର୍ଡ କରିଥିଲେ। ପରବର୍ତ୍ତୀ ସମୟରେ ସେହି ଭିଡିଓ ଭାଇରାଲ୍ କରିଦେବାକୁ ଧମକ ଦେଇ ୫ ଲକ୍ଷ ଟଙ୍କା ଦାବି କରି ବ୍ଲାକମେଲ୍ କରୁଥିଲେ।
ପୋଲିସର କାର୍ଯ୍ୟାନୁଷ୍ଠାନ
ପୀଡ଼ିତାଙ୍କ ସୂଚନା ଆଧାରରେ ଗୋବର୍ଦ୍ଧନ ଥାନା ପୋଲିସ ରାଧାକୁଣ୍ଡ ସ୍ଥିତ ଆଶ୍ରମ ଉପରେ ଚଢ଼ାଉ କରି ଅଭିଷେକଙ୍କୁ ଗିରଫ କରିଛି। ତାଙ୍କ ମୋବାଇଲ୍ରୁ ଅନେକ ମହିଳା ଓ ପୁରୁଷଙ୍କ ପ୍ରାୟ ଏକ ଡଜନରୁ ଅଧିକ ଆପତ୍ତିଜନକ ଫଟୋ ଓ ଭିଡିଓ ଜବତ କରାଯାଇଛି। ପୋଲିସ ଆଶ୍ରମରୁ ଅନ୍ୟ ଦୁଇଜଣ ଯୁବତୀ ଓ ଜଣେ ଯୁବକଙ୍କୁ ମଧ୍ୟ ଉଦ୍ଧାର କରି ସେମାନଙ୍କ ପରିବାରକୁ ହସ୍ତାନ୍ତର କରିଛି। ଭାରତୀୟ ନ୍ୟାୟ ସଂହିତା (BNS) ର ବିଭିନ୍ନ ସଙ୍ଗୀନ ଦଫାରେ ମାମଲା ରୁଜୁ କରି ଅଭିଯୁକ୍ତକୁ ଜେଲ୍ ପଠାଯାଇଛି ଏବଂ ଏହି ର୍ୟାକେଟ୍ରେ ଅନ୍ୟ କେଉଁମାନେ ସାମିଲ ଅଛନ୍ତି ସେ ନେଇ ଅଧିକ ତଦନ୍ତ ଜାରି ରହିଛି।
64 Total Count