କର୍ଣ୍ଣାଟକର ୧୧୬ ବର୍ଷୀୟା ଜଣେ ବୃଦ୍ଧା ‘ଲକ୍ଷ୍ମମ୍ମା’ଙ୍କର ଏମିତି ଏକ ଭିଡିଓ ଭାଇରାଲ୍ ହେଉଛି । ସେ ତିରୁମାଲାର ଆଲିପିରି ମାର୍ଗରେ ୩୫୫୦ଟି ପାହାଚ ଚଢ଼ି ଭଗବାନ ଭେଙ୍କଟେଶ୍ୱର ସ୍ୱାମୀଙ୍କ ଦର୍ଶନ କରୁଥିବା ଦେଖିବାକୁ ମିଳୁଛି ।
ଭିଡିଓରେ ଜଣେ ବୃଦ୍ଧା ମହିଳା ହାତରେ ବାଡ଼ିଟିଏ ଧରି ଧୀରେ ଧୀରେ ପାହାଚ ଚଢ଼ୁଛନ୍ତି । ମହିଳାଙ୍କ ସହ ତାଙ୍କ ପରିବାରର ଜଣେ ସଦସ୍ୟ ମଧ୍ୟ ଅଛନ୍ତି, ଯିଏ ତାଙ୍କୁ ସହାରା ଦେଇ ସାଙ୍ଗରେ ଚାଲୁଛନ୍ତି । ସାଧାରଣତଃ ୭୦-୮୦ ବର୍ଷ ବୟସ ପରେ ଲୋକଙ୍କର ଆଣ୍ଠୁ ବିନ୍ଧା ଏବଂ କ୍ଲାନ୍ତି ଭଳି ସମସ୍ୟା ଦେଖାଦେଇଥାଏ ।
ଏଭଳି ପରିସ୍ଥିତିରେ ୧୧୬ ବର୍ଷ ବୟସରେ କୌଣସି ବଡ଼ ସାହାଯ୍ୟ ବିନା ଏତେ ଲମ୍ବା ଏବଂ କଷ୍ଟକର ମାର୍ଗ ଚଢ଼ିବା ସତରେ ଆଶ୍ଚର୍ଯ୍ୟଜନକ ।ଭିଡିଓର ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ଏହି ବୃଦ୍ଧା ଜଣକ ସାରା ରାସ୍ତା ‘ଗୋବିନ୍ଦା-ଗୋବିନ୍ଦା’ ନାମ ଜପ କରି କରି ଏହି ଯାତ୍ରା ସମ୍ପୂର୍ଣ୍ଣ କରିଛନ୍ତି । ସେ ନିଜ ପାଖପାଖରେ ଥିବା ଲୋକ ଏବଂ ଭକ୍ତମାନଙ୍କ ଗହଣରେ ଧୀରେ ଧୀରେ କିନ୍ତୁ ମଜଭୁତ ପାଦରେ ଆଗକୁ ବଢ଼ୁଥିଲେ । ତାଙ୍କର ଏହି ସାହସ ଓ ଭକ୍ତି ସେଠାରେ ଉପସ୍ଥିତ ଥିବା ଅନ୍ୟ ଶ୍ରଦ୍ଧାଳୁମାନଙ୍କ ପାଇଁ ପ୍ରେରଣା ସାଜିଛି ।
ଏହି ଭିଡିଓକୁ ଏକ୍ସରେ ସେୟାର କରାଯାଇଛି । କ୍ୟାପ୍ସନରେ ଲେଖା ଅଛି, “ବୟସ କେବଳ ଶରୀର ପାଇଁ ରଖେ, ଭକ୍ତି ପାଇଁ ନୁହେଁ ।” ଉଲ୍ଲେଖଯୋଗ୍ୟ, ତିରୁମାଲାର ପାହାଡ଼ ପର୍ଯ୍ୟନ୍ତ ପହଞ୍ଚୁଥିବା ଆଲିପିରି ମାର୍ଗ ଶ୍ରଦ୍ଧାଳୁଙ୍କ ଆସ୍ଥାର ଏକ ପ୍ରମୁଖ କେନ୍ଦ୍ର । ଏହା ଏକ କଠିନ ରାସ୍ତା । ଏଥିରେ ହଜାର ହଜାର ପାହାଚ ଚଢ଼ିବା ପରେ ଯାଇ ଭଗବାନ ଭେଙ୍କଟେଶ୍ୱର ସ୍ୱାମୀଙ୍କ ଦର୍ଶନ ମିଳିଥାଏ ।
60 Total Count