କେନ୍ଦୁଝର ଲୋକସଭା ଆସନରୁ ତୃତୀୟ ଥର ପାଇଁ ନିର୍ବାଚିତ ହୋଇଥିବା ଅନନ୍ତ ନାୟକ ଆଜି ସଂସଦରେ ଲୋକସଭା ସଦସ୍ୟ ଭାବେ ଶପଥ ଗ୍ରହଣ କରିଛନ୍ତି । ଚଳିତ ସଂସଦୀୟ ଅଧିବେଶନର ଦ୍ୱିତୀୟ ଦିନରେ କାମଚଳା ବାଚସ୍ପତି ଭର୍ତୃହରି ମହତାବ ତାଙ୍କୁ ଶପଥ ଗ୍ରହଣ କରାଇଛନ୍ତି । ଶ୍ରୀ ନାୟକ ଆଜି ଓଡିଆ ଭାଷାରେ ଶପଥ ଗ୍ରହଣ କରିଛନ୍ତି। ଶପଥ ଗ୍ରହଣ କରିବା ପରେ ଶ୍ରୀ ନାୟକ ସାମାଜିକ ଗଣମାଧ୍ୟମରେ ପୋଷ୍ଟ କରି କେନ୍ଦୁଝରବାସୀଙ୍କୁ ଧନ୍ୟବାଦ ଦେବା ସହ ଲୋକଙ୍କ ଆକାଂକ୍ଷାକୁ ପୂରଣ କରିବାକୁ ଚେଷ୍ଟା କରିବେ ବୋଲି ଲେଖିଛନ୍ତି।
ରାଜନୀତିରେ ଅନନ୍ତ ନାଏକ ବିଜେପିର ସବୁଠୁ ବଡ ଚେହେରା । ୩୦ ବର୍ଷ ବୟସରେ କେନ୍ଦୁଝର ଲୋକସଭା ସିଟରୁ ନିର୍ବାଚନ ଜିତି କନିଷ୍ଠ ସାଂସଦ ହୋଇଥିଲେ ଅନନ୍ତ ନାଏକ । ପୁଣି ୨୦୦୪ରେ ବି ନିର୍ବାଚନ ଜିତିଥିଲେ । ସେ ଦୁଇ ଥର ସଂସଦକୁ ନିର୍ବାଚିତ ହୋଇଛନ୍ତି । ୨୦୧୯ ନିର୍ବାଚନରେ କଡା ପ୍ରତିଦ୍ୱନ୍ଦ୍ୱିତାରେ ହାରିଥିବା ଅନନ୍ତ ନାଏକଙ୍କୁ ଦଳ ଏଥର ପୁନଃ ଭରସା କରିଥିଲା , ପୁଣି ୨୦୨୪ ନିର୍ବାଚନରେ ଏହି ଆସନରୁ ସାଂସଦ ହୋଇଛନ୍ତି ଅନନ୍ତ।
ଜାତୀୟ ଜନଜାତି କମିଶନ ସଦସ୍ୟ ରହିଥିଲେ ଅନନ୍ତ ନାଏକ । ଏହି ସମୟରେ ସେ ଆଦିବାସୀଙ୍କ ବିକାଶ ପାଇଁ ଅନେକ ପଦକ୍ଷପେ ନେଇଛନ୍ତି । ମୋଦି ସରକାରଙ୍କ ଅତୁଳନୀୟ ଅବଦାନକୁ ତୃଣମୂଳସ୍ତରରେ ପହଞ୍ଚାଇଛନ୍ତି । ଜନଜାତିଙ୍କ ପାଇଁ କାମ କରି ସଭିଙ୍କର ଆପଣାର ପାଲଟିଛନ୍ତି । ଆଦିବାସୀ ସମାଜର ବିକାଶ ପାଇଁ ହୋଇଥିବା କେନ୍ଦ୍ରୀୟ ଯୋଜନାକୁ ଲୋକଙ୍କ ପାଖରେ ପହଞ୍ଚାଇବାରେ ତାଙ୍କର ପ୍ରମୁଖ ଭୁମିକା ରହିଛି । କେନ୍ଦୁଝର ଏକ ଆଦିବାସୀ ଅଞ୍ଚଳ ହୋଇଥିବାରୁ ଏହା ଅନନ୍ତଙ୍କୁ ଫାଇଦା ଦେବ ବୋଲି ରାଜନୈତିକ ସମୀକ୍ଷକ ଆକଳନ କରୁଛନ୍ତି ।
୨୦୧୯ ନିର୍ବାଚନରେ ବିଜେଡିର ଚନ୍ଦ୍ରାଣୀ ମୁର୍ମୁ ୫ ଲକ୍ଷ ୨୬ ହଜାର ୩୫୯ ଖଣ୍ଡ ଭୋଟ ପାଇ ବିଜୟୀ ହୋଇଥିଲେ। ବିଜେପି ପ୍ରାର୍ଥୀ ଅନନ୍ତ ନାଏକ ୪ଲକ୍ଷ ୬୦ ହଜାର ୧୫୬ ଖଣ୍ଡ ଭୋଟ ପାଇ ଦ୍ବିତୀୟ ସ୍ଥାନରେ ରହିଥିବା ବେଳେ କଂଗ୍ରେସ ପ୍ରାର୍ଥୀ ମୋହନ ହେମ୍ବ୍ରମ ୧ ଲକ୍ଷ ୨୮ ହଜାର ୭୧୬ ଖଣ୍ଡ ଭୋଟ ପାଇଁ ତୃତୀୟ ସ୍ଥାନରେ ରହିଥିଲେ।
107 Total Count