ପ୍ରଥମ ଥର ବିଧାୟକରୁ ମନ୍ତ୍ରୀପଦ । ମୟୁରଭଞ୍ଜର ମୋରଡା ବିଧାୟକ ଡାକ୍ତର କୃଷ୍ଣଚନ୍ଦ୍ର ମହାପାତ୍ରଙ୍କୁ ମିଳିଛି ମନ୍ତ୍ରୀ ପଦ । ଗୃହନିର୍ମାଣ ଓ ନଗର ଉନ୍ନୟନ ମନ୍ତ୍ରୀ ଭାବେ ଦାୟିତ୍ବ ଗ୍ରହଣ କରିଛନ୍ତି । ମାନ୍ୟବର ମୁଖ୍ୟମନ୍ତ୍ରୀ ମୋହନ ମାଝୀଙ୍କ ମନ୍ତ୍ରିମଣ୍ଡଳରେ ମୟୂରଭଞ୍ଜରୁ ୨ ଜଣ ସ୍ଥାନ ପାଇଥିବା ବେଳେ ମୋରଡ଼ା ବିଧାୟକ ଡାକ୍ତର କୃଷ୍ଣଚନ୍ଦ୍ର ମହାପାତ୍ରଙ୍କୁ ମିଳିଛି କ୍ୟାବିନେଟ୍ ପଦ ମିଳିିଛି। ପ୍ରଥମଥର ବିଧାୟକ ଭାବେ ନିର୍ବାଚିତ ହୋଇ କ୍ୟାବିନେଟ୍ ମନ୍ତ୍ରୀ ଭାବେ ସେ ଶପଥ ନେଇଛନ୍ତି।
ଛାତ୍ର ଜୀବନରୁ ସେ ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ (ଏବିଭିପି) ଓ ବିଶ୍ବହିନ୍ଦୁ ପରିଷଦ ସହ ଜଡ଼ିତ ଥିଲେ। ୧୯୯୫ରୁ ବିଜେପିରେ ସାମିଲ ହୋଇ ପ୍ରତ୍ୟକ୍ଷ ରାଜନୀତିରେ ପ୍ରବେଶ କରିଥିଲେ। ପରବର୍ତ୍ତୀ ସମୟରେ ସେ ୨ ଥର ବିଜେପିର ଜିଲ୍ଲା ସାଧାରଣ ସମ୍ପାଦକ ଓ ୨ ଥର ଜିଲ୍ଲା ସଭାପତି ଭାବେ କାର୍ଯ୍ୟ କରିଥିଲେ। ଜିଲ୍ଲା ସଭାପତି ଥିବାବେଳେ ୨୦୧୭ରେ ଜିଲ୍ଲା ପରିଷଦ ନିର୍ବାଚନରେ ବିଜେପି ୫୪ରୁ ୪୯ ଆସନ ହାସଲ କରି ରେକର୍ଡ କରିଥିଲା।
୨୦୧୯ରେ ସେ ମୋରଡ଼ା ବିଧାନସଭା ଆସନରୁ ନିର୍ବାଚନ ଲଢ଼ି ବିଜେଡିର ରାଜକିଶୋର ଦାସଙ୍କଠାରୁ ପରାସ୍ତ ହୋଇଥିଲେ। ତେବେ, ତାଙ୍କ ନେତୃତ୍ବରେ ଲଢ଼ିଥିବା ବିଜେପି ୯ରୁ ୬ଟି ଆସନ ହାତେଇଥିଲା। ୨୦୧୯ ନିର୍ବାଚନ ପରେ ସେ ରାଜ୍ୟ ବିଜେପି ସହରାଞ୍ଚଳ କମିଟିର ସଂଯୋଜକ ଓ ରାଜ୍ୟ କାର୍ଯ୍ୟକାରିଣୀ ସଦସ୍ୟ ଭାବେ କାର୍ଯ୍ୟ କରିଥିଲେ। ଚଳିତ ନିର୍ବାଚନରେ ସେ ପୂର୍ବତନ ବିଧାୟକ ରାଜକିଶୋର ଦାସଙ୍କ ପତ୍ନୀ ପ୍ରୀତିନନ୍ଦା କାନୁନ୍ଗୋଙ୍କୁ ପରାସ୍ତ କରି ପ୍ରଥମଥର ପାଇଁ ବିଧାନସଭାକୁ ନିର୍ବାଚିତ ହୋଇଛନ୍ତି।
୧୯୭୦ ମସିହାରେ ଖୁଣ୍ଟା ବ୍ଲକ୍ ଶିମିଳାବନ୍ଧ ଗାଁରେ ମନ୍ତ୍ରୀ କୃଷ୍ଣଚନ୍ଦ୍ରଙ୍କର ଜନ୍ମ ।ଏବେ ସେ ବାରିପଦାରେ ପରିବାର ସହ ରହୁଛନ୍ତି। ତାଙ୍କ ପିତା ରାମଚନ୍ଦ୍ର ମହାପାତ୍ରଙ୍କର ଦେହାନ୍ତ ହୋଇ ସାରିଥିବା ବେଳେ ଘରେ ଅଛନ୍ତି ମା’ ଶିବପ୍ରିୟା, ପତ୍ନୀ ଅନୁରାଧା ଦେବତା ଓ ସ୍କୁଲରେ ପଢ଼ୁଥିବା ୨ ପୁଅ। କୁଶଳଦା ଉଚ୍ଚବିଦ୍ୟାଳୟରୁ ମାଟ୍ରିକ୍ ପରେ ବାରିପଦାସ୍ଥିତ ମୟୂରଭଞ୍ଜ ଆୟୁର୍ବେଦ ମହାବିଦ୍ୟାଳୟରୁ ବିଏଏମ୍ଏସ୍ ଓ ଆଇନ୍ ଶିକ୍ଷାରେ ସେ ସ୍ନାତକୋତ୍ତର କରିଛନ୍ତି।
ସହରାଞ୍ଚଳର ଲୋକଙ୍କୁ ଉନ୍ନତମାନର ସେବା ଯୋଗାଇବା ନୂଆ ସରକାରର ପ୍ରାଥମିକତା ବୋଲି ସେ କହିଛନ୍ତି ।୨୦୧୯ ମସିହାରେ ସ୍ୱଚ୍ଛ ଭାରତ ସର୍ବେକ୍ଷଣରେ ଓଡିଶା ଦେଶର ୩୦ ତମ ସ୍ଥାନରେ ଥିବାବେଳେ ୨୦୨୩ରେ ଏହା ଦେଶର ଅଗ୍ରଣୀ ୪ଟି ରାଜ୍ୟ ମଧ୍ୟରେ ସ୍ଥାନ ପାଇଥିଲା । ୨୦୨୪ ମସିହାରେ ଜାତୀୟ ସ୍ତରରେ ଏକ ନମ୍ବରରେ ରହିବା ପାଇଁ ଲକ୍ଷ୍ୟ ଧାର୍ଯ୍ୟ କରି କାର୍ଯ୍ୟ କରାଯାଉଛି । ଏ କ୍ଷେତ୍ରରେ କେବଳ ଭୁବନେଶ୍ୱର ନୁହେଁ, ରାଜ୍ୟର ସମସ୍ତ ୧୧୫ ଟି ପୌରାଞ୍ଚଳକୁ ଗୁରୁତ୍ୱ ଦିଆଯାଇଛି । କୌଣସି ସହରରେ ନୂଆ ବର୍ଜ୍ୟ ଜମା କରିବାକୁ ଅନୁମତି ମିଳିବ ନାହିଁ । ପ୍ରତ୍ୟେକ ସହର ବର୍ଜ୍ୟମୁକ୍ତ ହେବା ପାଇଁ ଉଦ୍ୟମ କରାଯିବ ବୋଲି ସେ କହିଛନ୍ତି ।
82 Total Count