ବାହାରିନରେ କଳା, ସଂସ୍କୃତି, ବାଣିଜ୍ୟ ଏବଂ ପର୍ଯ୍ୟଟନର ଦ୍ୱିପାକ୍ଷିକ ଆଦାନ ପ୍ରଦାନ ପାଇଁ କିଙ୍ଗ ହାମାଦ ପ୍ରଦର୍ଶନୀ ବିଶ୍ୱ କେନ୍ଦ୍ରରେ ଯୁବ ବ୍ୟାପାର ମନ୍ତ୍ରଣାଳୟ ଏକ ଅନ୍ତର୍ଜାତୀୟ ଯୁବ ମହୋତ୍ସବ ଆୟୋଜନ କରିଥିଲା । ଏଥିରେ ଯୁକ୍ତରାଷ୍ଟ୍ର ଆମେରିକା, ଯୁକ୍ତରାଜ୍ୟ, ଜାପାନ, ଚୀନ୍, ଭାରତ ସମେତ 28 ଟି ଦେଶ ଅଂଶଗ୍ରହଣ କରିଥିଲେ।
ଏହି ପ୍ରଦର୍ଶନୀରେ ଭାରତୀୟ ଦୂତାବାସ ବାହାରିନ ଓଡ଼ିଆ ସମାଜ ସହଯୋଗରେ ଓଡ଼ିଶାର କଳା, ସଂସ୍କୃତି, ଉତ୍ପାଦ ଏବଂ ପର୍ଯ୍ୟଟନ ସୁବିଧା ପ୍ରଦର୍ଶନ କରି ଭାରତକୁ ପ୍ରତିନିଧିତ୍ୱ କରିଥିଲେ।
ଏହି ବିଶାଳ ଯୁବ ମହୋତ୍ସବ ଏବଂ ପ୍ରଦର୍ଶନୀକୁ କିଙ୍ଗଡମ୍ ଅଫ ବାହାରିନର ଯୁବ ବ୍ୟାପାର ମନ୍ତ୍ରୀ ମାନ୍ୟବର ସୁଶ୍ରୀ ରାୱାନ ବିଣ୍ଟ ନଜୀବ ତଫିକି ଉଦ୍ଘାଟନ କରିଥିଲେ। ଉଦଘାଟନ କରିବା ପରେ ପରେ ଭାରତୀୟ ରାଷ୍ଟ୍ରଦୂତ ଶ୍ରୀ ବିନୋଦ କେ ଜାକୋବ ଏବଂ ଅନ୍ୟ ରାଷ୍ଟ୍ରଦୂତମାନଙ୍କ ସହିତ ଓଡ଼ିଶା ମଣ୍ଡପ ପରିଦର୍ଶନରେ ଆସିଥିଲେ ।
ଏହି ମଣ୍ଡପରେ ଓଡ଼ିଶାର ଆଦିବାସୀ ଉତ୍ପାଦ ସମେତ ପର୍ଯ୍ୟଟନ ସୁବିଧା, ଓଡ଼ିଶାର ପାରମ୍ପରିକ ବସ୍ତ୍ର , ବାଲୁକା କଳା ଚିତ୍ର ଏବଂ ଅନ୍ତର୍ଜାତୀୟ ବାଲୁକା କଳାକାର ପଦ୍ମଶ୍ରୀ ସୁଦର୍ଶନ ପଟ୍ଟନାୟକ ଙ୍କ ପୁସ୍ତକ ଏବଂ ବିଭିନ୍ନ ଓଡ଼ିଆ ହସ୍ତ ଶିଳ୍ପ ଓ ହସ୍ତତନ୍ତ ପ୍ରଦର୍ଶନ କରାଯାଇଥିଲା ।
ମାନ୍ୟବର ଯୁବ ବ୍ୟାପାର ମନ୍ତ୍ରୀ ମାନ୍ୟବର ସୁଶ୍ରୀ ରାୱାନ ବିଣ୍ଟ ନଜୀବ ତଫିକି ତଥା ଭାରତୀୟ ରାଷ୍ଟ୍ରଦୂତଙ୍କୁ ବାହାରିନ ଓଡ଼ିଆ ସମାଜର ପ୍ରତିଷ୍ଠାତା ଅଧ୍ୟକ୍ଷ ଡକ୍ଟର ଅରୁଣ କୁମାର ପ୍ରହରାଜଙ୍କ ଦ୍ୱାରା ଓଡ଼ିଶାର ପାରମ୍ପରିକ ଅଙ୍ଗବସ୍ତ୍ର ଏବଂ ବାହାରିନ ଓଡ଼ିଆ ସମାଜ ସ୍ମରଣିକା ‘ବାହାରିନ ଉତ୍କଳିକା’ ସହ ସମ୍ମାନିତ କରାଯାଇଥିଲା।
ରାକ୍ଷୀ ପୂର୍ଣ୍ଣିମା ଅବସରରେ ବାହାରିନ-ଭାରତ ଆନ୍ତରିକ ସମ୍ପର୍କକୁ ସମ୍ମାନ ଦେବା ପାଇଁ ଯୁବ ବ୍ୟାପାର ମନ୍ତ୍ରୀ ତଥା ଭାରତୀୟ ରାଷ୍ଟ୍ରଦୂତଙ୍କ ହାତରେ ଓଡ଼ିଆ ସମାଜ ସଦସ୍ୟା ସୋନାଲିକା ବାହାରିନ ଭାରତ ବନ୍ଧୁତାକୁ ପ୍ରଦର୍ଶିତ କରୁଥିବା ଉଭୟ ରାଷ୍ଟ୍ରର ଜାତୀୟ ପତାକାରେ ପ୍ରଜାପତି ଆକୃତିର ଏକ ସ୍ୱତନ୍ତ୍ର ରାକ୍ଷୀ ବାନ୍ଧିଥିଲେ ।
ଓଡ଼ିଆ ମହିଳା ସଦସ୍ୟା ମାନେ ଓଡ଼ିଶାର ରାଜ୍ୟ ସଂଗୀତ ଏବଂ ସମ୍ବଲପୁରୀ ଲୋକ ନୃତ୍ୟ ପରିବେଷଣ କରିଥିଲେ । ଏକ ଭରପୁର ପ୍ରେକ୍ଷାଳୟରେ ଏହି ନୃତ୍ୟ ସଙ୍ଗୀତକୁ ଯୁବ ସଦସ୍ୟଙ୍କ ଦ୍ୱାରା ଗଭୀର ପ୍ରଶଂସା କରାଯାଇଥିଲା |
ଏହି ଷ୍ଟଲର ଲକ୍ଷ୍ୟ ଓ ଉଦ୍ଦେଶ୍ୟ ବ୍ରାଣ୍ଡ ଓଡ଼ିଶାକୁ ବିଦେଶମାଟିରେ ପ୍ରୋତ୍ସାହିତ କରିବା ଥିଲା ବୋଲି ବାହାରିନ ଓଡ଼ିଆ ସମାଜର ପ୍ରତିଷ୍ଠାତା ଅଧ୍ୟକ୍ଷ ଡ. ପ୍ରହରାଜ କହିଛନ୍ତି ।
ଡ. ପ୍ରହରାଜ ଆହୁରି କହିଛନ୍ତି ଯେ ବିଦେଶ ମାଟିରେ ଏହିପରି ମହାନ ଅନ୍ତର୍ଜାତୀୟ ଉତ୍ସବରେ ଅଂଶଗ୍ରହଣ କରିବା ଏବଂ ଭାରତର ସମୃଦ୍ଧ ସାଂସ୍କୃତିକ ଐତିହ୍ୟ, କଳା ଏବଂ ବାଣିଜ୍ୟ ପ୍ରଦର୍ଶନ କରିବା ଅତ୍ୟନ୍ତ ଗର୍ବର ବିଷୟ।
ଏହି ପ୍ରକାର କାର୍ଯ୍ୟକ୍ରମ ଦ୍ୱିପାକ୍ଷିକ ସମ୍ପର୍କକୁ ପ୍ରୋତ୍ସାହିତ କରିବ ଏବଂ କଳା, ବାଣିଜ୍ୟ ଏବଂ ପର୍ଯ୍ୟଟନକୁ ପ୍ରୋତ୍ସାହିତ କରିବା ପାଇଁ ଓଡ଼ିଶା ଓ ବାହାରିନ ମଧ୍ୟରେ ସେତୁ ଭାବରେ କାର୍ଯ୍ୟ କରିବ ବୋଲି ଡ. ପ୍ରହରାଜ କହିଥିଲେ ।
ବ୍ରାଣ୍ଡ୍ ଓଡ଼ିଶାର ପ୍ରଚାର ପାଇଁ ଡ. ଅରୁଣ କୁମାର ପ୍ରହରାଜଙ୍କ ଉଦ୍ୟମକୁ ଭାରତୀୟ ରାଷ୍ଟ୍ରଦୂତ ଶ୍ରୀ ବିନୋଦ କେ ଜାକୋବ ଗଭୀର ଭାବରେ ପ୍ରଶଂସା କରିଥିଲେ ।
ଉଲ୍ଲେଖଯୋଗ୍ୟ ଯେ, ଦୁଇ ମାସ ପୂର୍ବେ ଭାରତୀୟ ଦୂତାବାସରେ ODOP- ଏକ ଜିଲ୍ଲା ଏକ ଉତ୍ପାଦ କାର୍ଯ୍ୟକ୍ରମ ରେ ‘ଓଡ଼ିଶା ପ୍ରାଚୀର’ ଏକ ବଡ଼ ସଫଳତା ପାଇଥିଲା ।
ଗତ ୨୬ବର୍ଷ ଧରି ବାହାରିନ ଓଡ଼ିଆ ସମାଜର ପ୍ରତିଷ୍ଠାତା ଅଧ୍ୟକ୍ଷ ଡ.
ଅରୁଣ କୁମାର ପ୍ରହରାଜ ସମୃଦ୍ଧ ସାଂସ୍କୃତିକ ଐତିହ୍ୟ ସମ୍ପନ୍ନ ଜଗନ୍ନାଥ ସଂସ୍କୃତି, ଓଡ଼ିଆ ବାଣିଜ୍ୟ, ପର୍ଯ୍ୟଟନ ଏବଂ ହସ୍ତତନ୍ତକୁ ବିଶ୍ବ ସମୁଦାୟର ଦୃଷ୍ଟି ଆକର୍ଷଣ କରିବାକୁ ଚେଷ୍ଟା କରି ଆସୁଛନ୍ତି । ସେ ଏବଂ ତାଙ୍କର ସଂଗଠନ ବାହାରିନ ଓଡ଼ିଆ ସମାଜ ଏହି ମିଶନରେ ବହୁ ପରିମାଣରେ ସଫଳ ମଧ୍ୟ ହୋଇଛନ୍ତି । ଏଥିପାଇଁ ତାଙ୍କୁ ଓଡ଼ିଶାର ବୁଦ୍ଧିଜୀବୀ ସମାଜ ଧନ୍ୟବାଦ ଜଣାଇଛନ୍ତି ।
36 Total Count